ກອງປະຊຸມໃຫຍ່ໜ່ວຍພັກ ບໍລິສັດ ເຄຫາການຄ້າແມ່ຂອງ ຄັ້ງທີ IV ຈັດຂຶ້ນວັນທີ 21 ພະຈິກ 2024 ທີ່ ພະແນກຖະແຫຼງຂ່າວ ວັດທະນະທຳ ແລະ ທ່ອງທ່ຽວ (ຖວທ) ນະຄອນຫຼວງວຽງຈັນ (ນວ) ເປັນປະທານຂອງ ສະຫາຍ ນາງ ວຽງພອນ ແກ້ວຄູນສີ ຄະນະປະຈຳພັກ ນວ ເລຂາຄະນະພັກຮາກຖານ ຫົວໜ້າພະແນກ ຖວທ ນວ ແລະ ສະຫາຍ ໄມທຳ ອຸ່ນມະໂນ ເລຂາໜ່ວຍພັກ ບໍລິສັດ ເຄຫາການຄ້າແມ່ຂອງ ມີບັນດາຄະນະພັກພະແນກ ເລຂາຮອງເລຂາໜ່ວຍພັກອ້ອມຂ້າງ ຜູ້ແທນສົມບູນ ແລະ ແຂກຖືກເຊີນເຂົ້າຮ່ວມ.

ໃນກອງປະຊຸມ ສະຫາຍ ໄມທຳ ອຸ່ນມະໂນ ໄດ້ຂຶ້ນຜ່ານບົດລາຍງານການເມືອງທັງສອງພາກ ຍົກໃຫ້ເຫັນຜົນງານທີ່ຍາດໄດ້ດ້ານດີ ດ້ານອ່ອນຂໍ້ຄົງ້າງ ແລະ ບົດຮຽນທີ່ຖອດຖອນໄດ້ໃນການນໍາພາ-ຊີ້ນຳຂອງໜ່ວຍພັກຕະຫຼອດ 5 ປີຜ່ານມາ (2019-2023) ເຊິ່ງໜ່ວຍພັກ ບໍລິສັດ ເຄຫາການຄ້າແມ່ຂອງເປັນໜ່ວຍພັກໜຶ່ງຂຶ້ນກັບຄະນະພັກຮາກຖານພະແນກ ຖວທ ນວ ມີຄະນະໜ່ວຍພັກ 2 ສະຫາຍ ແລະ ສະມາຊິກພັກ 5 ສະຫາຍ ເຮັດໜ້າທີ່ບໍລິການທ່ອງທ່ຽວ ໂຮງແຮມ ຮ້ານອາຫານ ຮ້ານບັນເທີງ ຄາຣາໂອເກະ ແລະ ເປັນບໍລິສັດຮ່ວມທຶນກັບຕ່າງ

ປະເທດ ໂດຍສະເພາະປະເທດຈີນ ໃນຜ່ານມາໜ່ວຍພັກໄດ້ເອົາໃຈໃສ່ເຮັດວຽກງານໜ້າທີ່ການເມືອງ ຂະຫຍາຍສະມາຊິກພັກ ສ້າງສະມາຊິກພັກໃຫ້ມີຄຸນນະພາບເປັນແບບຢ່າງນໍາໜ້າໃຫ້ມະຫາຊົນ ແລະ ພະນັກງານ ໄດ້ນໍາພາວຽກງານວິຊາສະເພາະຢ່າງຕັ້ງໜ້າໃນການດຳເນີນທຸລະກິດໃນຂົງເຂດຄວາມຮັບຜິດຊອບຂອງຕົນ ເຕົ້າໂຮມຄວາມສາມັກຄີພາຍໃນ ແລະ ທິດທາງແຜນການ 5 ປີຕໍ່ໜ້າ (2024-2029) ສືບຕໍ່ນໍາພາສະມາຊິກພັກ ແລະ ພະນັກງານຜັນຂະຫຍາຍມະຕິຂອງກອງປະຊຸມໃຫຍ່ຂອງພັກຕົນ ໃຫ້ປາກົດຜົນເປັນຈິງ ສືບຕໍ່ນໍາພາວຽກງານ

ທ່ອງທ່ຽວ ເຕົ້າໂຮມຫົວໜ່ວຍທຸລະກິດທັງພາຍໃນ ແລະ ຕ່າງປະເທດໃຫ້ດຳເນີນທຸລະກິດຖືກຕ້ອງຕາມລະບຽບກົດໝາຍ ນອກນັ້ນ ສະຫາຍ ນາງ ບົວສີ ສີສະຫວັດ ຮອງເລຂາໜ່ວຍພັກບໍລິສັດ ເຄຫາການຄ້າແມ່ຂອງ ໄດ້ຂຶ້ນຜ່ານຮ່າງບົດສະຫຼຸບແຜນພັດທະນາຂະແໜງການ 5 ປີຜ່ານມາ ແລະ ທິດທາງແຜນການ 5 ປີຕໍ່ໜ້າ ໂດຍຍົກໃຫ້ເຫັນຜົນສຳເລັດໃນການເຮັດໜ້າທີ່ຂອງໜ່ວຍພັກໃນການຈັດຕັ້ງປະຕິບັດແຜນພັດທະນາໃນປີຜ່ານມາເຫັນວ່າສາມາດຍາດ ໄດ້ຜົນງານໃນການດຳເນີນທຸລະກິດດ້ານການສ້າງລາຍຮັບເຂົ້າງົບປະມານຂອງລັດ.

ໃນຕອນທ້າຍກອງປະຊຸມຍັງໄດ້ບົ່ງຕົວແຕ່ງຕັ້ງເອົາຄະນະໜ່ວຍພັກບໍລິສັດ ເຄຫາການຄ້າແມ່ຂອງສະໄໝທີ IV ໂດຍແມ່ນ ສະຫາຍ ໄມທຳ ອຸ່ນມະໂນ ເປັນເລຂາໜ່ວຍພັກ ແລະ ສະຫາຍ ນາງ ບົວສີ ສີສະຫວັດ ເປັນຮອງເລຂາໜ່ວຍພັກ ທັງເປັນຜູ້ກວດກາພັກ ນອກນີ້ໃນກອງປະຊຸມຍັງໄດ້ຮັບຟັງການໂອ້ລົມໃຫ້ທິດເຍືອງທາງການຈັດຕັ້ງປະຕິບັດມະຕິກອງປະຊຸມໃຫຍ່ໃນ 5 ປີຕໍ່ໜ້າຈາກສະຫາຍເລຂາຄະນະພັກຮາກ ຖານພະແນກ ຖວທ ນວ ຕື່ມອີກ.